كچی موسڵمانی لە خواترس : پایز هەرچەندە ڕۆڵی هەبێت لەوەی كە پەڕەی ناسكی گوڵەكان هەڵوەرێنێ ، سەد هێندە بێباكی و بەسادەیی بیركردنەوەی گوڵەكان ڕۆڵی هەیە لە هەڵوەرینیان .
چەندە جوانن ئەو گوڵانەی دارەكان دەڕازێننەوە ، بەڕاستی جوانی قوتابخانە و ماڵ و سەرشەقام و باخچە گشتیەكان بە گوڵەوە هێندەی تر جوان دەبنەوە .
بەڵام ئەوەی سەرسامی كردووم سادەیی بیركردنەوەی گوڵەكانە ، هیچ كۆمەڵێكیان پەند لەوانەی پێش خۆیان وەرناگرن !! بە بەردەوامی دەستی چەپەڵ و خوێناوی شەهوەتبازان هەڵیان دەوەرێنن ، یان لە پاش هەڵپچڕانیان لە دارەكانیان تێر بۆندەكرێن ، لە پاشان سیس دەبنەوە و ئەوانیش هەتا دەستیان بگات فڕێیان دەدەن.
بەڕاستی جوانی و گەشاوەیی گوڵ بەودارەوەیە كە هەڵیگرتووە كە ئەم دەست و ئەو دەستی كرد هیچ ڕەونەقێكی نامێنێ لەڕاستی دا ، چیرۆك و بەسەرهاتی گوڵە باخ هاوشێوەی بەسەرهاتی تۆی كچە لە ناو كۆمەڵگاكەت كۆمەڵگا ئەو دارەیە كە تۆی گوڵی هەڵگرتووە بەڕاستی كۆمەڵگا بەتۆی گوڵەوە جوانە ، ئەو كەسانەش كە بێ ڕەحمانە و بە هەرشێوەیەك بێت هەوڵی هەڵوەراندنت ئەدەن ئەوەندە كاریان بەتۆی گوڵە تاوەكو لەداری كۆمەڵگا دەتكەنەوە و تێر بۆنت دەكەن ، دوای ئەوە یان هەڵت دەوەرێنن یان دەهێڵن سیس هەڵگەڕێی تاوەكو بەرنەفرەتی كۆمەڵگاكەت دەكەویت ئەو كات تۆ لەدەست دەچیت و كاریان بەتۆ نامێنی ، لەدوای تۆ پەنا دەبەنە بەر وەراندنی گوڵێكی تر لە دەستە گوڵی خوشكانت بۆ ئەوەی بەرەو ئەو هەڵدێرەی ڕەوانە بكەن كە تۆیان بۆ ڕوانە كرد.
خوشكی بەڕێز تۆیش سەرەتای گەشبونەوەت چەشنی گوڵە باخە ، و هەر دەستە و ئەیەوێ دەست پێشخەری بكات بۆ هەڵپچڕان و بۆنكردنت و ڕۆژانەش بێ شومار چاوی شەهوەتبازانت دەكەوێتە سەر ئاگەداربە هەر ئەوەندە دەستیان كەوتی تاكاتی تێربوونی ئارەزوەكانیان بۆنت دەكەن و ئەڵێن : هەر تۆ شك ئەبەم !!! كە كاریشی پێت نەما و ئارەزوە شەیتانیەكەی تێر بوو بە چەشنێك فڕێت دەدەات وەك بڵێی هەر نەتیناسی بێ !!!!
بەڵێ خوشكی بەڕێز : چیرۆكی ژیانی تۆیش دەقا و دەق چیرۆكی ژیانی گوڵەباخە ، مانەوەی بەجوانی بەقەد دارەوە ، مانەوەتە بە پاكی لەناو كۆمەڵگا ، هەڵپچڕانی یاخود هەڵوەرینی لەدەست دانی گەورەترین شتێكتە كە (شەرەف و ناموست)ـە ، سیس هەڵگەڕانیشی مانەوەتە لە كۆمەڵگا بەنەفرەت لێكراوی تەنها جیاوازییەك لە نێوانی تۆی كچ و گوڵدا هەیە ، گوڵ كە پایز هەڵیدەوەرێنی بڕیاری قەدەرە و دەبێ دارەكەیشی قایل بێ بەو قەدەرەی هاتوەتە ڕێگەی ، بەڵام هەڵوەڕینی تۆی كچ یاخود سیس بونت دەستی خۆتی تێدایە كە خۆت تەسلیمی جۆرە بیركردنەیەك دەكەیت دەتباتە دونیایەكی ئەفسانەیی تا ئەو كاتەی بەئاگا دێی دەبینی هیچت بۆ نەماوەتەوە !!
دەبا ڕۆژانە هەڵوەرینی پەڕەی سەدەها گوڵ ببێتە پەندێك بۆ تۆو هاوڕێكانت .
(تەنهــا تۆ شك دەبەم !! دەتخوازم !! دێمە خــوازبینیت !!! )
بۆ هەموو خوشكێكی باوەڕداری لە خوا ترسی بێ ئاگا لە تۆڕی جاڵجاڵۆكەكانی سەردەم ، لە نیازی پیسی ئەو كوڕانەی كـە سەرە ڕێگاكانیان پێ دەگرن و دوایان دەكەون و نامەیان بۆ دەنێرن و… ئەو كوڕانەی بە وشەی (تەنهــا تۆ شك دەبەم !! دەتخوازم !! دێمە خــوازبینیت !!! ) تۆی باوەڕدار بێهۆش دەكەن ، و پاش ماوەیەك چۆن ڕەشەبای پایز یاری بە گەڵا وەریوەكان دەكات ، بگرە لەوە خراپتر یاری بە (شەرەف و ناموسی ) تۆی بێ ئاگا دەكەن ...
بۆ هەموو ئەو خوشكانەی كە هەڵگری ناسنامەی ژیری و شەرم و ڕێزن ، و هێشتا شەیتانەكانی سەردەم لە خشتەی نەبردون : داواتان لێ دەكەم لە چەند دێڕی ئەم نامە كراوەیەدا لە گەڵمدا بن و بە جوانی بیخوێننەوە ، و بیرێكیش لە دوا ڕۆژتان بكەنەوە و ئاگاتان لە بەڵێنی پڕ درۆ و فێڵی كوڕانی دەروون بەزیو ، و دوور لەخوا بن .
خوشكانی بەڕێزم : ڕاستە یەكەم هەنگاو كوڕ دەینا ، بەڵام ئەگەر ڕەزامەندی تۆی لە سەر نەبێت ئەو هەر لە یەكەم هەنگاوی یەوە بێ ئومێد دەبێت و بە سەر شۆڕی ملی ئەو ڕێگایە دەگرێتە بەر كە لێ‌یەوە هاتووە ، ئەوەش بزانە ئەو جۆرە گەنجانەی كە ئاماژەم بۆ كردن لەم سەردەمە لە گورگ خراپتر و دڕندەترن ، ڕەنگە سەیر بێ بەلاتەوە بەڵام بزانه ئەم گورگەی كە پێویست دەكات لێ‌ی بترسی گۆشتی لە تۆ ناوێ ، و ئازارێكی كاتیت پێ ناگەیەنێ بەڵكو شتێكی لە تۆ دەوێ بە نرخ ترین و بە بەهاترین شتە بۆ تۆ ، شتێكی لێت دەوێ كە پێوەی سەری خۆت و بنەماڵەكەت بەرزە ، ئەو شتە بەنرخـــەش (شەرەف و ناموس)ی تۆیە ، هەر كە دەستی ئەم دڕندەیە كەوت هەموو دونیات هەبێ ئامادەبی بیدەی بۆ گێڕانەوەی ، بەڵام جارێكی تر دەستت ناكەوێتەوە ، وە لە پاش لە دەست چوونی نە بە ئاسودەیی و خۆشبەختی دەژیت و نەش بە ئاسودەی دەمریت ، ئەم تاوانەش تاوەكو مردن وەك دێوەزمەیەك بە دواتەوە دەبێت و ڕاوت دەنێ !!
مردنی مەڕ لە سەرەتای بینینی گورگەوە دەست پێ دەكات بەڵام ئەم گورگەی تۆ لە ڕۆژێكدا سەد جار دەتكوژێ و ناشمریت و مردنیش لەو ساتەدا بۆ تۆ خۆشترە لە ژیان ، چونكە ژیانی تۆ بەوەوە ژیانە كە ئەو گورگە دەیەوێ بیبا ، گەر بە ئاگاش نەبی لە كەمترین كاتدا دەیباو بەر نەفرەتی كۆمەڵگا دەكەوی ، و ئازارێكی سەختیش یەخەت دەگرێ و لێت نابێتەوە .
خوشكی موسڵمان : گەر سەرنجی بەسەرهات و چیرۆكی لای خوارەوە بدەی ڕاستیەكانت زیاتر بۆ دەرئەكەوێت ئاشكرا دەبێت .
یەكێك لەو كچانەی ـ كە ژیانی شیرینی پڕ لە بەختەوەری لەخۆ تاڵكردوە ـ ئەڵێ: لە گەڵ كوڕێك یەكترمان ناسی ، ماوەیەك لە پاش ئەم یەكتر ناسینە كوڕە ئامادەیی خۆی دەربڕی بۆ ئەوەی بێتە خوازبینیم ، خۆشحاڵ بووین هەر هەموو وای هەست دەكرد كە كاتی شوكردن نزیك بووەتەوە ، بەڵام بەداخەوە یەكتر بینینەكەمان تا دەهات پەرەی دەسەند و زیادی دەكرد بە شێوەیەك تاك بە تاك من و ئەو بە تەنهایی لە دەرەوەی بازنەی خێزان لەگەڵ بە سەر چوونی ڕۆژگار من و كوڕە تووشی چەند تاوانێكی بچوك بووین ، كە ڕۆژ لە دوای ڕۆژ لەگەڵ یەكتر بینینی بە تەنهایی تاوانەكانمان لە زیاد كردن دا بوو .
بەڵام بە داخەوە دوای ئەنجام دانی تاوانی هەرە گەورەو كە شەرەفی خۆم و هەموو كەس و كارەكەشمی پێوە بەند بوو !! كەچی بەو حاڵەش بەجێ‌ی هێشتم ! بە جێی هێشتم بەبیانوی ئەوەی نەمتوانیوە بەرەنگاری ئەو بكەمەوە وشەرەفی خۆم بپارێزم ! گەر بمخوازێ متمانەی پێم نابێ ، چونكە نەم توانیوە ڕێگا لە ئارەزوە پیسەكانی ئەو بگرم !! و ئامادە دەبم لەگەڵ یەكێكی تریشدا هەمان كردەوە ئەنجام بدەم !! كە لەگەڵ ئەم شەهوەت بازە پیسەدا ئەنجامم داوە وە بەبیانووی ئەوەی چیشم لەگەڵ ئەو دا كردبێ ئامادەم لەگەڵ كەسێكی تریشدا بیكەم !!
خوشكی باوەڕدار : ئەمەی كە بۆم گێڕایتەوە قوربانیەكە لە قوربانی یەكانی بەڵێنە پڕ لە درۆكانی كوڕان ، ئەم كوڕە متمانەی نەبوو بەو كچە بیخوازێ بەڵام خۆی ئامادەیە لە گەڵ (10) كچی تردا ڕێك كەوێ تاوەكو یەكێكیان بخوازێ ، ئەمەش متمتانە و بەڵێنی كوڕی ئەم زەمانەیە !!!
بۆیە وەكو برایەكی دڵسۆز بەرامبەر بە خوشكی خۆی پێت ئەڵێم :
تۆ خاوەن شەرەفیت و شەرەفیشت سەروەتێكی زۆر گەورەیە چەندەها دز بە ڕۆژ و شەو ئاواتە خوازی دزینی ئەو سەروەتەی تۆن ، گەر دزێك هات و لە دەرگای دا پێت ووت كێ‌ی ؟ وتی دزم ، پێت ووت فەرموو چیت ئەوێ بیبە ، هەرچی ویست لە ماوەیەكی كەمدا دەیبا و هەڵدێ .
لەو ساتە وەختە دا چی دەكەی ؟ هاوار دەكەی ؟ بە هەموو تواناتەوە دەنگ هەڵ دەبڕیت و ئەڵێی : خەڵكینە فریام كەون دز سەروەت و سامانی تاڵان كردم ؟ ماڵی وێران كردم ؟ چ سودێكی هەیە ئەو ڕۆیشت ، و هەڵهات ، تۆش دەستە و ئەژنۆ لە پاڵ دیوارەكاندا دادەنیشیت و بۆ خۆت دەگری .
ئەوەش بزانە خوشكی بەڕێزم : ئەو ماڵەی دز لە ماڵانی دەدزێ زۆر بە ئاسانی شتە دزراوەكان دێنەوە جێگای خۆیان ، و هەرشتێكی دزراو لەو ماڵە شتێكی نوێ تری بۆ دەكڕڕێت ، و لە جێگەی دزراوەكە دایئەنێ‌ی ، بەڵام ئەوەی دزی ئەم سەردەمە لە تۆی ئافرەتی ئەوێ شتێكە كە لە دەستت چوو بە هەموو دوونیا بۆت ناكڕڕێتەوە و دەستت ناكەوێتەوە .
لە دونیا بەر تانە و تەشەرەی خەڵك دەكەویت و لە قیامەتیشدا توشی سزایەكی سەخت ئەبیتەوە ، كەوابوو بەم كارەت دونیا و قیامەتیش لە دەستی خۆت ئەدەی ، و دوا ڕۆژی خۆیشت ئەسوتێنی ، و سزای پەروەردگاریش بۆ خۆت مسۆگەر ئەكەی .
بۆیە : لێرەوە وەك برایەكی دڵسۆز پێت ئەڵێم هەموو ووشەیەكی سۆزداری كە دەینووسی یان بۆت دەنووسن ، هەموو ووشەیەكی سۆزداری كە بۆ كوڕان دەیكەی یان بۆتی دەكەن ، هەموو چركەیەكی سۆزداری لە سەرت حسێب دەكرێ و لە قیامەت دا لێت دەپرسن بۆ كێت كرد ؟ بۆچی كردت ؟... ؟ ... ؟ ... هتد .
ئەوەش بزانە مردن گەورە و بچوك نازانێ ڕەنگە لە ساتە وەختێكدا بمری كە سەرقاڵی قسەكردن بیت لەگەڵ كوڕاندا و سەر مەستی سۆزداری بیت .
یان ڕەنگە لە ساتە وەختێكدا بمری نامەی كوڕێك دەخوێنیتەوە یان تەلەفونی لەگەڵ دەكەی یان نامەی بۆ دەنووسی .
ئایا ئەتەوێ لە كاتێكدا بمری كە ناشیرینترین ووتە و ووشە لەگەڵ كوڕاندا ئاڵ و گۆڕ دەكەی ؟ ئـەتەوێ تووشی سزای سەخت بیت لە قیامەت ؟ بۆ چی ؟ بە هۆی كێوە ؟ لەگەڵ كەسانێك و بە هۆی كەسانێكەوە كە هەرگیز مانای شەرەف و ناموسیان نەزانیوە و دوای شەهوەتی خۆیان كەووتوون .
پێت چۆنە ئەو ساتە وەختەی دەتخەنە ناو گۆڕێكی تاریك و بە تەنهایی بەجێت دەهێڵن . تەنانەت خۆشەویستەكەت و هەموو ئەو كوڕانەی كە تۆیان بە شازادەی خۆیان دەزانی بە جێت دێڵن ، و پاش ماوەیەك لە بیر كەس نامێنی . هەر هەموو بەجێت دێڵن و دەبیتە هاوڕێی كرم ومێرووەكانی ژێر زەمین ، ئەو دەم و چاوە ناسكەی لە ژیاندا جوانت دەكردەوە ، ئەو زمانەی كە لە ژیاندا تەرخانت كردبوو بۆ كوڕان ئەم ڕۆ لە ناو گۆڕدا ژەمێكی باشە بۆ تێركردنی كرم مێرووەكانی ناو گۆڕ .
ئەڵێی چی چەند ساڵێكە و واز دەهێنم لە دەمەتەقێی كوڕان ، ئەی ئەگەر مەرگ لە تۆ خێرا تر بوو ، لە پاش مردن تەوبە دەكەیت و پەشیمان دەبیتەوە ؟! بەڵام ئەوەش بزانە خوشكی بەڕێز : سوێند بە پەروەردگار بەر لە مردن تەوبە نەكەی تەوبەت لێ وەرناگیرێت ، وەئەگەر لە سەر ئەو حاڵەش مردی و تەوبەت نەكردبێ پەشیمانی هیچ سودێكی نابێ هەر وەك پەروەردگار ئەفەرموێ : [ حَتَّى إِذَا جَاء أَحَدَهُمُ الْمَوْتُ قَالَ رَبِّ ارْجِعُونِ لَعَلِّي أَعْمَلُ صَالِحًا فِيمَا تَرَكْتُ ] [المؤمنون : 99] .
واتە : كاتێك كە مردنە یەخە بە یەكێكیان دەگرێت ، دەڵێت خوایا بمگەڕێننەوە بۆ ئەوەی كردەوەی چاكە بكەم لەو دونیایەی بەجێ‌ی دەهێنم .
وە لە وەڵامدا پێت ئەڵێن [ كَلَّا إِنَّهَا كَلِمَةٌ هُوَ قَائِلُهَا وَمِن وَرَائِهِم بَرْزَخٌ إِلَى يَوْمِ يُبْعَثُونَ ] [سورة المؤمنون : 100] .
واتە : نەخێر ، ئەوە ووشەیەكە ئەو بێژەرێتی ، و لە نێوان ئەو و دونیادا ، پەردەیەك دادەدرێت ، تا ئەو ڕۆژەی زیندوو دەبنەوە .
جا خوشكی بەڕێزم بپاڕێرەوە بۆ ئەوەی پەروەردگارت تۆزێك ڕەحمت پێ بكات ، چونكە ئێسكەكانی لاشەت هەموو ناسكن و بەرگەی بچوكترین سزا ناگرن .
بۆیە خوشكم : وەكو برایەك پێت ئەڵێم تۆزێك لە كاتەكانی ڕۆژانەت تەرخان بكە بۆ بیركردنەوە و بەخۆدا چوونەوە ، بیرێك لەو ڕەفتارانە بكەرەوە ڕۆژانە ئەنجامی دەدەی ، چونكە دەبێ باش بزانی تەلەفۆن كــردن و نـامە نووسین و خوێندنەوەت و وێنەگـرتن ، و دەمەتەقێت لە گەڵ كوڕانا تەنانەت بە مەبەستی شووكردنیش بێ كارێكی ناشەرعی و خیانەت كردنە لە نەفسی خۆت و كەس و كارەكەت كە بە دزی ئەوانەوە ئەم كردار و ڕەفتارانە ئەنجام دەدەی ، دڵی پاك و سپی خۆت بە دەستی شەیتانەكان ڕەش و پیس دەكەی ، پاش هەموو ئەمانە چاوەڕوانی چی دەكەی لە كوڕان ؟ خەڵات كردنت ؟! یان دەست خۆشی لێ كردنت ؟! هەرگیز بیرت نەچێ خوشكم هەروەخت كوڕی ئەم سەردەمە ئیشی پێت نەما سەرزەنشتت دەكا و پێت ئەڵێ : تۆ بە كەڵكی من نایەیت ، چۆن بە قسەكانی من فریوت خوارد ، سبەینێ بە قسەی یەكێكی تریش فریوو دەخۆی و هەڵدەخەڵەتێ‌ی ، ئەمە پاداشتی كوڕانی سەردەمە بۆ تۆ خوشكم .
بۆیە لە پاش خوێندنەوەی ئەم نامەیە و ئەو چیرۆكە كاتی ئەوە هاتووە بە خۆتا بچیتەوە بۆ ئەوەی بە دەستی خۆت دواڕۆژی خۆت نەسوتێنی .
وە ئەگەر ئەتەوێ بڵێی من متمانەم بە خۆم هەیە و ناتوانێ پێش خواستن هیچم لەگەڵدا بكا و سوێندی خواردوە بێتە داخوازیم ، ئەوا منیش پێت ئەڵێم ( 4 ) خاڵی گرنگ هەیە پێویستە بیزانی :
1 ـ ئەو كچەی لە چیرۆكەكەدا بەسەر هاتی ژیانی خۆی دەگێڕێتەوە وەكو تۆ متمانەی بە خۆی و هاوڕێكەی هەبوو ، بەڵام لە كۆتایی دا نە پەیمانەكان تا سەر بوو نە متمانەكانیش لە جێگای خۆی بوو ، كچەكەش دوا ڕۆژی سووتا .
2 ـ كاتێك ئەڵێی متمانەم بەخۆم هەیە ئایە تۆ لە دایكی ئیمانداران ـ خێزانەكانی پێغەمبەر ﷺ ـ پاكتر و بە توانا تری وە لەوان ئیماندار تر و بەڕێز تری ؟ كە پەروەردگار فەرمانیان پێ دەكا و دەفەرمووێ : [ يَا نِسَاء النَّبِيِّ لَسْتُنَّ كَأَحَدٍ مِّنَ النِّسَاء إِنِ اتَّقَيْتُنَّ فَلَا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ وَقُلْنَ قَوْلًا مَّعْرُوفًا ] [سورة الأحزاب : 32] .
واتە : ئەی خێزانەكانی پێغەمبەر ﷺ ئێوە وەكو ئافرەتانی تر نین ، ئەگەر لە خوا بترسن ، لە كاتی قسەكردندا ناز مەكەن ، بۆ ئەوەی كەسانی دڵ نەخۆش تەماحتان تێنەكەن ، با ووتەكانیشتان ووتەی چاك بێت .
منیش ئەڵێم : نەخێر و هەزار نەخێر نە لەوان پاكتری و نەش لەوان ئیماندارتری كە خۆیان لە شەڕی پیاوان بە دوور دەگرت .
3 ـ بە كردەوەی عیشق بازی ، و تەلەفۆن كردن ، و نامە و نامەكاری و دەمەتەقێ و ... هتد ، تۆ دەبیتە دەروازەیەك بۆ دروست كردنی تاوان ، و دەبیتە سینەمای چاوی كوڕان ، و دەبیتە سەرچاوەی تاوان باركردنی خۆت و چەندین كەسی تر ، بەمەش دوو تاوانت دێتە سەر :
أ ـ سەرپێچی كردنی خۆت لە فەرمانی پەروەردگارت .
ب ـ گوناهی ئەوانەشت دێتە سەر كە پابەندی تۆ و قسەكانی تۆ بوون
4 ـ بەڵێنی كوڕانی ئەم سەردەمە ، چەند ووشەیەكە و هیچی تر وەك : دەتخوازم !!! تۆ تەنها هی منی !!! و ... !! و ...!!! ... هتد .
وە ئەم ووشانەش یەكێكن لەو دەروازانەی كە كوڕان لێ‌یەوە دێنە نێو ژیانی تۆ ، و بێهۆشت دەكەن و گەورەترین تاوانت دەرهەق دەكەن و بە بەهاترین و بەنرخترین شتت لە دەست دەر دەكەن ، و وەك شوشە عەترێك وای دەتشكێنن نە عەترەكەت بۆ كۆبكرێتەوە نە شوشەكەیشت بۆ پینە بكرێ ، وەعد و پەیمانەكەشیان خۆ ماست نییە بە دەمیانەوە دیار بێ لە كۆتایش دا هەرچی ڕووبدا لە نێوان تۆ و كوڕێك دا پاش ماوەیەك ئەگەر كوڕە تەوبە بكا لە نێو خەڵكی دا بە تەوبەكار ناو دەبرێ با درۆیش بكا .
بەڵام گەر تۆ تەوبەیەكی ڕاستەقینەش بكەی خوای پەروەردگار لێت خۆش دەبێ و ئیماندارانیش باوەڕت پێدەكەن ، بەڵام لە نێو خەڵكی دا وەكو لەكەیەكی ڕەش ، وەكو مۆرێك بە نێو چاوانتەوە دەمێنێتەوە و دەبیتە چیرۆكی سەر زاری خەڵكی و بە چاوێكی سووك ، و خراپەوە تەماشات دەكەن .جا پێش ئەوەی توشی سزای پەروەردگار ، و تانە و تەشەرەی خەڵك بیت ، خۆت لە كوڕان و بەڵێنی كوڕان بپارێزی ، لە پەروەردگار بپاڕێرەوە و داوای لێ بكە كە لە خراپەیان بتپارێزێت .
لە كۆتایش دا داواكارم لە پەروەردگاری بە بەزەیی و لێبووردەم ، لە گوناهەكانمان خۆش بێ ، و هەموو كچێكیش ـ لەگەڵ تۆش دا ـ لە تۆڕی جاڵجاڵۆكەكانی سەردەم و دزانی ناموس ، و گورگەكانی شەرەف بپارێزێ .
وَآخِرُ دَعْوَانَا أَنِ الْحَمْدُ لِلّهِ رَبِّ الْعَالَمِينَ
