وەڵاهی بڵێین بەندەی ڕەمەزانن كەواتە با لە ڕەمەزانیش خۆیان دانەپۆشن قسەیەكی هەڵەیە، ئەگەر بۆ یەك ڕۆژیش مرۆڤ خۆی دابپۆشێت ئەوە جێگای دڵخۆشیە خوای گەورە دامەزراویان بكات،  وەكارێكی چاكەیە، چونكە: [فَمَنْ يَعْمَلْ مِثْقَالَ ذَرَّةٍ خَيْرًا يَرَهُ ][الزلزلة:7].
یەك مسقاڵە زەڕەش مرۆڤ خێر بكات ئەوە دەیبینێتەوە ، وە ئەو ئافرەتەی كە پێش ڕەمەزان پۆشتە نەبووەو لاشەی خۆی دەرخستووە بۆ خەڵك ئامۆژگاریمان ئەوەیە كە تەقوای خوای گەورە بكەن، چونكە هەموو كات ئافرەت لە ئیسلام گرانبەهایە، شتی گرانبەهاش دەبێت لەشوێنی پارێزراو و لە شوێنی توند‌و بەرزو بەنرخدا بێت، ئافرەت تا لە پۆشاكی خۆیدا بێت‌و بۆ پێویستی خۆی نەبێت نەیەتە دەرەوە ئەوە ڕێزی ئافرەت لەوەدایە، وە كاتێكیش كە ڕەمەزان جلێكی شەرعی لەبەر دەكات‌و خۆی دادەپۆشێت دەگەڕێتەوە لای خوای خۆی ئەوە دڵمان پێ‌ خۆشە بەوە ، وە دوعای خێری بۆ دەكەین ان شا‌ء الله خوای گەورە دامەزراویان بكات ، وە كە جلیش لەبەر دەكات با نیەتی خۆی خاڵص بكات‌و داوا لە خوای گەورە ‌بكات كە بەردەوامی پێ‌ ببەخشێت نەك بەو نیەتە جل لەبەر بكات بڵێ من بۆ ڕەمەزانمەو دوای ڕەمەزان تەواو دای دەنێمەوە، ئەگەر ئەو نیەتەی هەبێت ئەوە فێڵ لەخۆی دەكات، چونكە مرۆڤ دەبێت نیەتی چاكەی بەردەوامی هەبێت، نەك نیەتی خراپەی بەردەوامی هەبێت، وە نابێت مرۆڤ وەكو ئەو ئافرەتە وابێت كە خوای گەورە لە قورئان باسی دەكات: [وَلاَ تَكُونُواْ كَالَّتِي نَقَضَتْ غَزْلَهَا مِن بَعْدِ قُوَّةٍ أَنكَاثًا][النحل:92].
ڕۆژێك تا ئێوارە خەریكی ڕستن‌و چنین بێت ئێوارەكە هات داوەكەی ڕابكێشێت‌و هەمووی هەڵوەشێنێتەوە، كەواتە هیچی نەكرد.
یان شاعیرێك دەفەرمووێت:
(متى يَبلُغُ البُنيانُ يوماً تمامَه، -- إذا كنتَ تبنيهِ وغيرُك يهدمُ؟)
تۆ مانگی ڕەمەزان خەریكی عیبادەت بیت كە ڕەمەزانیش تەواو بوو ڕۆژی جەژن هات یەكسەر دەست بكەیت بە تاوان‌و جلەكانت دابنێت‌و یەكسەر دەست بكەیت بە تاوان‌و گوناهكردن‌و واز لە نوێژ بێنێت، ئەوە خۆی ماڵی خۆی كاول دەكات بەدەستی خۆی [يُخْرِبُونَ بُيُوتَهُم بِأَيْدِيهِمْ ][الحشر:2].
وەكو خوای گەورە دەفەرمووێت: ماڵی خۆیان بەدەستی خۆیان كاول دەكەن، خۆیان ڕووڕەش دەكەن لای خوای گەورە، ئەوجا كێ دەڵێت تۆ دوای ڕەمەزان كە گەڕایتەوە لای شەیتان‌و وازت لە خوای گەورە هێنا كێ دەڵێ لەو كاتەدا تۆ نامری بە ڕووڕەشی‌و بە زەلیلیەوە، بە كۆڵی تاوانەوە، كەواتە ئامۆژگاریمان بۆ ئەو خوشكانە ئەوەیە كە وانەبن بەڵكو زیاتر ڕوو لە خوابن ان شا‌ء الله ڕەمەزان ببێتە هەنگاوێك‌و قۆناغێك كە تێیدا بگەڕێنەوە لای خوای خۆیان‌و تەوبەیەكی ڕاست بكەن‌و لاپەڕەیەكی سپی لەگەڵ خوای خۆیان هەڵبدەنەوە‌و بەردەوام بن لەسەری إِنْ شَا‌ء اللهُ خوا موەفەقیان بكات.

پرسیار : كەواتە سفوریەكەیان پەیوەندی بەڕۆژەكەیانەوە نییە‌و ئەجرو پاداشت لەسەر ڕۆژووەكەیان وەردەگرن؟ وە سزاش لەسەر ئەم ئیشەی تریان وەردەگرن؟ 
وەڵام : بێگومان ان شا‌ء الله . بێگومان بەڵێ.

پرسیار : وە ئەگەر هات‌و بەو نیەتەوە خۆی دابپۆشێت كە دوای ڕەمەزان دەست پێ‌ بكاتەوە لەسەر ئەو خۆ دانەپۆشینە؟
وەڵام : تاوانێكی گەورەیە‌و ئەو نیەتە هەڵەیە.

ئاڕاستە کردنى پرسیارەکان مامۆستا صلاح الدین
وەڵامدانەوەى دکتۆر عبداللطیف أحمد