ئەو هۆكارانە چین كە گەنجان دوور دەخاتەوە لەتاوانی عیشق و خۆشەویستی : ماڵپەڕی وەڵامەکان
ئەو هۆكارانە چین كە گەنجان دوور دەخاتەوە لەتاوانی عیشق و خۆشەویستی

یەکەم ـ خاڵی سەرەكی داخستنی چاوە لە ئاستی نامەحرەمدا جا چ كوڕ بێت یان كچ بێت وەكو خوای گەورە فەرمانی پێكردووین و دەفەرموێت: [ قُل لِّلْمُؤْمِنِينَ يَغُضُّوا مِنْ أَبْصَارِهِمْ ] (النور: 30)، واتە: ئەی پێغەبەر بەپیاوانی ئیماندار بڵێ كەوا چاو لە ئاستى نامەحرەمدا دابخەن، وە لەئایەتێكی دیكەدا بەئافرەتان دەفەرموێت [ وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ ] (النور: 31) واتە: وە بەئافرەتانی ئیماندار بڵێ كەوا چاویان لە ئاستى پیاوانى نامەحرەمدا دابخەن.
بەڕاستی یەكەم هۆكار بۆئەوەی دوورت بخاتەوە داخستنی چاوە چونكە پێغەمبەری خودا دەفەرموێت: " العين تزني وزناها النظر " (البخاري ومسلم)، واتە: چاو زینا دەكات زیناكەشی نەزەر و تێڕوانینی نامەحرەمە.
بۆیە كاتێك كەسێكی نامەحرەمت بینی دەستبەجێ چاوت دابگرە بۆ ئەوەی لەدڵتدا شێوەكەی جێگیر نەبێت و دواتر نەیەتەوە یادت.
دووەم ـ خۆ نزیك كردنەوە لەخوا و تێكەڵ بوونی كەسانێك كە خوات بەبیر دەهێننەوە، وە دەبێت زیاتر لەناو ئەو كۆمەڵ و كەسانەدا دابنیشی كەوا زیاتر باسی فەزڵ و نیعمەتەكانی خوات بۆ دەكەن و زیاتر باسی خۆش ویستنی پێغەمبەری خوات بۆ دەكەن یان باسی زیكرو فەرموودە سەحیحەكان دەكەن وە دەبێت وریای هەر پێنج فەرزە نوێژەكان و زیكرەكانی پاش نوێژ و زیكری بەیانی و ئێوارە و زیكرەكانی تر بیت، چونكە تاوانت لا قێزەون دەكەن و ئیمانت لا شیرین دەكەن وە ئەو جۆرە كەسانە دەبێت دەستیان پێوە بگریت بۆ ئەوەی لەدەستت دەرنەچن ئەگینا دواتر هاوڕێیەتی كەسانێك دەكەی كە هەر خەریكی عیشق و غەرامن.
پێغەمبەری خواش دەفەموێت: " لا تصاحب إلا مؤمنا... " (حسن: صحيح سنن أبي داود: 4832)، واتە: تەنها هاوڕێیەتی ئیماندار بكە.
لێرەدا دەبێت ڕەچاوی ئەوە بكەیت كە دەبێت كەسانێك بەهاوڕێی خۆت هەڵبژێریت بەڕاستی دڵنیا بیت لەدینەكەی ئەو، وە تەنانەت دینەكەی خۆتیش چونكە ئەگەر باش نەبوو ئەوە گومڕات دەكات و سەرت لێ دەشێوێنێت.
سێیەم ـ دوور كەوتنەوە لە تەماشاكردنی ئەو فلیمانەی كە تێكەڵاوى كوڕان و كچانی تێدایە وە تەماشانەكردنی ئەو فلیمانەی كە ڕەواج بەعیشق و دڵداری و داوێن پیسی دەدەن وە دەبێت كتێب یان نامیلكە و گۆڤار و كورتە چیرۆكی عیشق و خۆشەویستی نەخوێننەوە، چونكە وات لێ دەكەن ئەو تاوانەت بۆ حەڵاڵ دەكەن و زۆر بەجوانی ترش و خوێ پێكراوەی بۆت باس دەكەن دواتر تۆش وا دەزانی شتێكی ئاساییەو تایبەتە بەژیانی خۆتەوە بۆیە پەنای بۆ دەبەیت و دەیخوێنیتەوە.
چوارەم ـ كاتە بەتاڵەكان و ئەو كاتانەی كە بەتەنهای هەوڵ بدە بەشتێكی باش و سوود بەخش پڕی بكەرەوە یان هەوڵ بدە كتێبی پڕ لە زانست و نامیلكەی ئاینیی بخوێنەرەوە بۆ ئەوەی بتوانی بەباشی لەدینەكەت شارەزا ببێت و كەس نەتوانێت بەئاسانی بەسەر دینتدا زاڵ ببێت كۆمەڵە بیروڕایەكت فێربكات كە دوایی ئاكار و ڕەوشتیشت تیا بچێت و تووشی تاوانی گەورەتر ببێت خوا پەنامان بدات، چونكە ئەو كاتانە كە بە شتی چاك پڕت نەكردەوە دوایی شتی خراپت دێتە بەردەست و تۆش ناتوانی بەئاسانی خۆتی لێ لابدەی.
پێنجەم ـ زوو ژنهێنان یاخود زوو شووكردن یەكێكە لەهۆكارە گرنگەكان بۆ دوور كەوتنەوە لەتووشبوون بەتاوانی عیشق و دڵداری، چونكە گەر كەسێك هاوسەری نەبێت ئەوا خەڵكی هەوڵ دەدەن بەناوی خوازبێنی بوون و بەهاوسەرى دواڕۆژ مسۆگەركردن هەڵت دەخەڵتێنن و لەخشتەت دەبەن.
پێغەمبەری خوا لە فەرموودەیەكدا پێمان دەفەرموێت:" يا معشر الشباب من استطاع منك الباءة فليتزوج... " (صححه الألباني في صحيح الترمذي).
واتە: ئەی كۆمەڵی گەنجان هەركەسێك لەئێوە توانای ژن هێنانی هەبوو ئەوا با ژن بهێنێت.
وە لە فەرموودەیەكی تردا دەفەرموێت:" إذا أتاكم من ترضون دينه و خلقه فزوجوه... " (صحيح الجامع: 270).
واتە: ئەگەر كەسێك هاتە خوازبێنى كچ یان خوشكانتان و لە ڕەوشت و دیندارێتی ڕازی بوون ئەوا ژنى بدەنآ....
بۆیە داوام لەخوای گەورە ئەوەیە كە من و ئێوەش بەڕێگە پاك و چاكەكەی ئیسلام شاد بكات و دوورمان بخاتەوە لەتاوان و لەكاری خراپە.

سەردان: ٣,٨١٥ بەش: عیشق و خۆشەویستى