بەناوى خواى گەورە و میهرەبان
بەكارهێنانی ناو و ئەلقاب كە بۆ پێویستی ببێ و هیچ مانایەكی خراپی تێدا نەبێ و هۆكار نەبێت بۆ پەرتەوازەكردنی موسڵمانان و هاندەر نەبێت بۆ هەڵگرتنی بیروباوەڕی خراپ بە ناوی ئیسلامەوە ئەوە دروستە ، لەوانەش كە خراپن (أهل الكلام ، الفلاسفة ، الجهمية ، الخوارج ، المعتزلة ، الروافض ....) بەڵام ناونان بە (أهل الحديث ، أهل التقوى ، أهل القرآن ، أهل السنة والجماعة ، أهل الأثر ، السلفية ، الطائفة المنصورة ، الفرقة الناجية ، الجماعة......) ئەمانە دروستن چونكە مانا و دەلالەتی خراپیان تێدا نیە و دەلالەتی باشیش دەگەیەنن بۆ نموونە وشەی (السلف) لە زمانی عەرەبیدا بەمانای پێشینی خۆت دێت لە زانست و ئیمان و چاكە و خێردا .
ابن منظور لە (لسان العرب) دا (9/159) ئەڵێ : (والسّلف أيضا من تقدّمك من آبائك و ذوي قرابتك الذين هم فوقهم في السِّنِّ والفضل ولهذا سُمي الصدر الأول من الصحابة السلف الصالح)
هەروەها وەكو فەرموودەش پێغەمبەری خوا ﷺ بەكاری هێناوە كە بە (فاطمة)ی كچی ئەڵێت : (فانّه نعم السلفُ أنا لك) رواه مسلم (2450)
لەزاراوەی زانایاندا (سلف) بەمانای (صحابە)دێت ئیمامی بوخاری ڕیوایەتی دەكات كە (ڕاشد)ی كوڕی (سعد) كە تابعی یە ئەڵێ : (كان السلف يستحبّون الفُحولة لانها أجرى وأجسر) فتح الباري ج6/82 چاپی (دار الكتب العلمية) .
واتە : (صحابە) هاوەڵان لە بۆ غەزا ئەسپی (نێر)یان بە باشتر دەزانی لە ماین چونكە ئازا و خێرا ترە . مەبەست لەم (أثر)ە وشەی (السلف) كە لەسەردەمی (تابعین) دا بەكارهاتووە و بۆ صحابەش بەكارهاتووە واتا بۆ مانایەكەی .
ئیمامی موسلیم لە پێشەكی صەحیحەكەیدا لاپەڕە 16 ڕیوایەت دەكات لەڕێگەی (محمد)ی كوڕی (عبدالله) ئەڵێ گوێم لێ بوو علی كوڕی شەقیق دەیگوت لە عبدالله ی كوڕی (مبارك)م بیست لەناو خەڵكیدا دەیگوت (دعوا حديث عمرو بن ثابت فانه كان يسبُّ السلف) .
كەوا بوو سەلەفیەت نیسبەتە بۆ (السلف) ئەمەش نیسبەتێكی چاكە بۆ مەنهەجێكی حەق و بیدعە و مەزهەبێكی تازە نیە .
شێخ ابن تیمە ڕەحمەتی خوای لێ بێ لە مجموع الفتاوی 4/149 ) ئەڵێ :
[ لا عيب على من أظهر مذهب السّلف وانتسب اليه واعتزى اليه،بل يجب قبول ذلك منه بالاتفاق ، فان مذهب السلف لايكون الا حقاً](مجموع الفتاوى(: (4/149).
واتە : عەیب نی یە لەسەر كەسێك كە مەزهەب و بەرنامەی سەلەف ئاشكرا بكات و خۆی بداتە پاڵی (بڵێت من سەلەفیم) ، بەڵكو پێویستە ئەم شتەی لێ وەربگیرێت بەیەك دەنگی زانایان ، چونكە مەزهەبی سەلەف تەنها حەق دەبێت .
بڕوانە مێژوو نووسی ئیسلام پێشەوا (الذهبي) ڕەحمەتی خوای لێ بێ لە كتێبی (سير أعلام النبلاء) دا (16-457) لە ژیاننامەی حافظ الدارقطني دا ئەڵێ : (لم يدخل الرَّجلُ أبدأً في علم الكلام ولا الجدال ولا فاضَ في ذلك بل كان سلفياً) .
ئەگەر كەسێك بڵێت باشە خوای گەورە لە قورئاندا دەفەرموێت :{ هُوَ سَمَّاكُمُ الْمُسْلِمينَ مِن قَبْلُ } (78) سورة الحـج
واتە : ناوی لێ ناوین بە (مسلم) موسڵمان ئیتر بۆچی ناوی تر بەكاربهێنین؟ ئێمە دەڵێین ڕاستە زۆر شیاویشە ئەگەر تاقمە گومڕاكان ناو و مەزهەب و ڕێچكەی خراپیان بەناوی ئیسلام و موسڵمانانەوە دروست نەكردایە هەمووشمان دەزانین هەرچی مەزهەب وحیزب و تاقمی گومڕا هەیە لە عالەمی ئیسلامیدا خۆی بە موسڵمان دەزانێت ، ئەی ئەبێ ئەوە كێ بێت نوێنەرایەتی ئیسلامی ڕاستەقینە بكات ئەگەر هەموومان تەنها ناومان موسڵمان بێت ، بۆ نموونە ئەگەر كەسێك پێت بڵێ مەزهەبت چیە ئەگەر تۆ بڵێیت موسڵمانم پێت دەڵێت باشە خەڵكی هەموو خۆی بە موسوڵمان دەزانێت (شیعە ، خوارج ، جهمیە ، معتزلە) چۆن خۆت لەوانە جیا دەكەیتەوە و ئیسلامی ڕاستەقینەش دەپارێزیت؟ ئەگەر بڵێیت موسوڵمانێكم لەسەر قورئان و سوننەت هەموویان ئەوە دەڵێن كەوابوو ئەبێ بڵێیت موسڵمانێكم لەسەر مەنهەجی سەلەف واتا قورئان و سوننەت بە تێگەشتنی سەلەف (صحابە) ئەو كاتە هیچ تاقمێك ناتوانێت بەردەوام بێت . ئەنجا ناوی سەلەفی دژی ناوی مسلم نیە وەك موشریك یان كافر كە بەرامبەر بەناوی (مسلم)ە لەدژایەتی كردندا وە ئیسلام خۆی ئەوە دەخوازێت كە سلف لەسەری بوون وەك بە ئایەت ڕونكرایەوە وە چەندین حەدیسمان لەسەر ئەو مەسەلەیە هەیە وە لە حەدیسی افتراق دا هاتووە (فقيل من هي الناجية؟ قال ما أنا عليه اليوم وأصحابي) . 

بەڕێز : مامۆستا خلیل أحمد وەڵامى داوەتەوە