کۆمەڵە ئامۆژگاریەک بۆ کەسێک بیەوێت قورئان لەبەر بکات: ماڵپەڕی وەڵامەکان
کۆمەڵە ئامۆژگاریەک بۆ کەسێک بیەوێت قورئان لەبەر بکات
پرسیار:

چۆن دەست بکەم بە لەبەرکردنى قورئان ؟ 

کۆمەڵە ئامۆژگاریەک بۆ کەسێک بیەوێت قورئان لەبەر بکات

یەکەم ؛ ئامادەکاری بۆ لەبەرکــردن 

١-  پێویستـە خۆت  ئامادە بکەیت بۆ لەبەرکردنی قورئان و ھەڵگری ڕەوشتەکانی بیت  وە پەیوەست بیت  بە سوننەتی پێغەمبەری خوا صلی اللە علیە وسلم  .

٢-  نیازپاکیت ھەبێت  لە کردارەکانتدا  و نیەتەکەت پاک بکەیتەوە  بۆ پەروەردگار و داوای نیازپاکی لێ بکەیت .

٣- خۆت بپارێزی لە خۆبەزلزانی  و فەخرکردن و ھەبوونی ڕیا  تاوەکو بێبەش نەبیت لە بەرەکەتی لەبەرکـردن و زاکیرەت سەلامەت بیت .

٤- پشت ببەستـە بە پەروەردگار  بە تەنـھا  وە داوای لێبـکە کە  لەبەرکردنی کتێبەکەیت بۆ ئاسان بکات .

دووەم ؛ پێش لەبەر کردن 

١- یەک نوسخـە لە قورئان بۆ خۆت ھەڵبژێرە ، ئاساییە نوسخەکە نوسخەی مەدینـە  بێت یا حەرەمەین  چونکە وەکو چۆن لەبەرکـردن بە  بە بیستن دەبێت بە ھەمان شێوە بە بینینیش دەبێت  جا وێنەی پەڕەکە  و شوێنی ئایەتەکان لە مێشکدا  جێگیر دەبێت  بەھۆی زۆر خوێندنەوە و سەیر کردنی قورئانەکە .

٢- ڕوو بکە لەبەرکردن بە ڕاستگۆیی و ئارام گریەوە بەبێ دوو دڵى .

٣-  مەپچرێ لە لەبەرکردن و دووبارە کردنەوە چونکە ئەوە دەبێتە ھۆی  لەبیرچونەوە  و لاوازبوونی ئیرادە .

٤-  خشتەیەک بۆ خۆت دابنـێ و بیخە سەروی ھەموو ئەو شتانەی بەلاتەوە گرنگە  وە لێپرسینەوە لەگەڵ خۆت بکە و ھانی بدە بۆ جێبەجێ کردنی  .

٥- پێداگربە لەسەر کاتەکەت و تەرخانی بکە لەبەرکردن و دووبارە کردنەوە .

 ٦- سێ جوزئی کۆتایی لەبەر بکە پاشان لە سەرەتای قورئانەوە دەست پێ بکە تاوەکو  بەربەستی ترس لە سورەتە درێژەکان بشکێنی .

٧-  بە تەرتیب و لە دوای یەک لەبەری بکە و لەبەرکردنەکەت دابەش مەکە تاوەکو  دانەبرێی وە توشی بێ تاقەتی نەبیت .

٨-  ھەوڵ بدە کە ویردی ڕۆژانەت  پەیوەندی دار بێت  بە بابەتەکەیەوە  واتە با ویردی رۆژانەت بە کۆتایی سورەتەکە یا چیرۆکە کۆتایی بێت .

سێیەم ؛ لە کاتی لەبەرکردنـدا 

١- پێداگربـە لەسەر خوێندنەوەیەکی دروست ئەوەش بە خوێندن لەلای مامۆستایەک  یاخـود بە بیستنی ویردی رۆژانەت چونکە زۆرێک لە وشە ھەیە کە بە ھەڵە دەخوێنرێتەوە  جیاواز لە شێوەی خۆی .

٢-  تێرامێنە لە مانای ئایەتەکان  لەکاتی خوێندنەوەیدا  وە ھەوڵ بدە لێی تێبگەی  بە  قەلەمێک  کە ئەو بڕەی دواتر لەبەری دەکەیت بۆت ئاسان بکات .

٣-  بە جوانی و دەنگی خۆشەوە قورئان بخوێنەوە .

٤-  ویردی رۆژانەت دابەش بکە بۆ چەند بەشێک ،  بەشی یەکەم لەبەر بکە  تاوەکو جێگیر دەبێت پاشان بەشەکەی تر لەبەر بکە و پاشان ھەردوکیان پێکەوە دووبارە بکەوە و بەم شێوەیە .

٥-  ھەوڵ بدە زیاتر لە جارێک گوێ لە ویردی رۆژانەت بگریت لە دوای لەبەرکردنی  .

٦-  ھەوڵ بدە کەسێک گوێت لێ بگرێت وە شتێکی چاکە کەسێکیش لەگەڵت بێت  لەبەری بکات تاوەکو  ھانی یەکتری بدەن .

٧-  مەڕۆ سەر ویردی دواتر ھەتاوەکو ئەم ویردەی لەسەریت بە جوانی  لەبەری دەکەیت .

٨-  لە دوای تەواو بوون لە ھەر سورەتێک بە تەواوی دووبارەی بکەوە .

چوارەم ؛ لە دوای تەواو بوونى لەبەرکردن 

١ - بەردەوامبە لەسەر چاودێری کردنی  ئەوەی لەبەری دەکەی  چونکە وەکو چۆن قورئان لەبەر کردنی ئاسانە بە ھەمان شێوە لەبیرچونەوەشی ئاسانە .

٢-  بەردەوامبە لەسەر خوێندنەوەی ویردێکی جێگیری ڕۆژانە .

٣-  بەردەوام با قورئانێکت پێ بێت لەگەڵ خۆت ھەڵی بگریت کاتێک لە ماڵ دەرەچیت بۆ دووبارە کردنەوە .

٤- زۆر گوێ لە قورئان بگرە .

پەروەردگارە لەوانەمان بگێرە کە قورئان دەخوێننەوە و پێی بەرز دەبنەوە  و مەمانگێرە لەوانەی قورئان دەخوێننەوە و گومڕا دەبـن  ، بمانگێرە لەوانەی حەلاڵی بە حەلاڵ دادەنێن و حەرامـی بە حەرام دادەنێن ، بڕوا دێنن بەو ئایەتانەی زیاتر لە مانایەک ھەڵدەگرن  وە کردار دەکەن  بەو ئایەتانەی دامەزراون و روون و ئاشکران  وە بە شەوان و رۆژانە  دەیخوێننەوە بەو شێوەیەی تۆ لێمان رازی دەبیت ، بمانگێرە لە ئەھلـی قورئان کە ئەھلی تایبەتی تۆن . 

زانای بەرێز - محمد بن صالح العثیمین-  رەحمەتی خوای لێبێت - فەرموویەتی :

ئەگەر تۆ رێنمویی و ھیدایەتت دەوێت ئەوا لە قورئان تێرامێنە ، وە پەلە مەکە و لێی بێ ئاگا مەبە ، زۆرینەی خەڵکى ئەمرۆ قورئان دەخوێننەوە یان لەبەر ئەوەی پاداشت وەربگرن بە خوێنەوەکەی یان بۆ تەبەروک کردن پێوەی  ، بەڵام زۆرینەیان بە تێرامانەوە نایخوێننەوە بەمەش بێبەش بوونـە لە سوود بینین لێی . 

[ شرح الکافیة الشافیة — ٥٠٣/١ ]

سەردان: ٤٥٧ بەش: فەزڵ و ئادابەکانى قورئان