سەبارەت بە سیفاتی مونافیقی هاوچەرخ!

لە قورئان و فەرموودە دا، باسی بنەماکانی سیفاتی مونافیقیان کردووە، بە پێی ئەم بنەمایانە دووڕویی مونافیق لە شوێنێک بۆ شوێنێکی دیکە لە زەمانێک بۆ زەمانێکی دیکە؛ بە شێوازی جودا جودا دەردەکەوێت، و مونافیقەکە بە  ڕەفتار و گوفتاری خۆی -بە پێی زەمان و مەکان- دان بە نیفاقەکەی دەنێت، ئیمانداریش بە نوری ئیمان دەیناسێت، و بەسنوری شەرع حوکمی لەسەر نادات، بەڵام لەبەر ئەوەی زۆر لە ئیمانداران لەم ناسینە غافڵن، بۆیە بە باشمان زانی لەم وەڵامەدا باس لە چەند ڕەفتار و گوفتارێکی مونافیقی هاوچەرخ بکەین، و موسڵمانان لێی ئاگادار بکەینەوە:

یەکەم : مونافیقی ئەم سەردەمە (هاوچەرخ)؛ هەوڵدەدات ئیسلام وەکو داعش پیشان بدات، و هەوڵدەدات کردەوەکانی داعش و هاوشێوەکانی بە ڕەنگدانەوەی قورئان و فەرموودە بزانرێن! 

دووەم : مونافیقی هاوچەرخ؛ پێی خۆشە کەسێکی موسڵمان کارێکی تیرۆرستی بکات، و کارەکەی بۆ ئیسلام دەگەڕێنتەوە، و ئەگەر کەسێکی نەصرانی هەمان کار بکات، دەڵێت: نەخۆشی نەفسی هەبوو!

سێیەم :  مونافیقی هاوچەرخ؛ پێی ناخۆشە ڕەخنە لە ڕۆژهەڵاتناسێکی دژە ئیسلام بگیرێت، و ئەگەر ڕەخنە لە بوخاری -خاوەنی صحيح- بگیرێت، دەڵێت: ئەشهەدوو بیلا وایە!

چوارەم : مونافیقی هاوچەرخ؛ زۆر حەزی لە سفورە، ئەگەر ئافرەتی موسڵمان خۆی بە عەبای خەلیجی داپۆشێت؛ دەڵێت: ئەمە غەزوێکی فیکری کومەڵایەتییە، دژی جلى کوردی! و ئەگەر هەمان ئافرەت لاسای ژنی سەرکوتی ئەوروپی بکاتەوە، پێ خۆشە و بە پێشکەوتن دەزانێت!

پێنجەم : مونافیقی هاوچەرخ؛ بە سوتانی دارستانێکی ئەمەزوون فرمێسک دەبارێنی، پشت لە سوتاندنی ژن و منداڵانی بۆرما دەکات، دەڵێت شەرت نییە وا بێت!

شەشەم : مونافیقی هاوچەرخ؛ کە دەبیستێ کەونە کەنیسەێک لە فەرەنسا یان ئەمریکا سوتاوە، دەڵێت حەیف و مخابن شارستانیەت بوو! بەڵام دەیان مزگەوت کە سەدان ساڵ تەمەنیان هەیە، بە تەیارەی ئەورپی و ئەمریکی کاول دەکرێن؛ نوقەی نایەت!

حەوتەم : مونافیقی هاوچەرخ وەکو بانێک و دوو هەوا تەماشای مێژوو دەکات، بۆ نمونە ئەگەر هەڤاڵێکی پێغەمبەرمان ﷺ، هەڵەیەکی هەبێت، سەدان جار دووبارە دەکاتەوە لە سەری زیاد دەکات، بەڵام باسی دڵوپەیەک لە دەریای چاکەکانیان ناکات. با لە بیر نەکەین مونافیقی هاوچەرخ؛ ناسراوە بە ڕق و کینەی بۆ عومەری کوری خەتاب رضي الله عنه! چونکە باپیرانی لە سەردەمی فتوحاتی ئەو دا موسڵمان بوون.

هەشتەم : مونافیقە هاوچەرخەکانمان؛ زۆر پەروش و ئارەزوومەندن، بۆ دیانەتە کۆنەکانی فارس، وەکو زاردەشتی و مزدەکی و خۆرمی...هتد، ئەگەر بۆیان بڕەخسێت دەڵێن ئیسلام دینی عەرەبە، پێویستە ئێمە بۆ زەردەشتییەت بگەڕێنەوە! 

نۆیەم : زۆربەی مونافیقە هاوچەرخەکانمان، بە دەمارگیری نەتەوەی کوێر بوون، پێوەری ڕاستی و ناڕاستی کارەکان لایان؛ لایەنگیری نەتەواتییە! با هاونەتەوەکەی بکوژ و دز و جەردە و گەندەڵ بێت!

دەیەم : مونافیقە هاوچەرخەکانمان؛ زۆر دڵتەنگن بە قەڵەباڵغی مزگەوتەکان، و ئەگەر کەسێک بچێت بۆ حەج یان عومرە، دەڵێن: با ئەو مەسرەفەی بە هەژارێک بەخشیبا باشتر بوو! لە هەمانکاتدا بە تێکەڵی و خەرجی زۆری ئاهەنگی سەری ساڵی دیانەکان؛ دڵ خۆشن! تەنانەت ئەگەر موسڵمانێک پێی بڵێت ئاهەنگی سەری ساڵی میلادی دروست نییە لە ڕووی شەرعەوە؛ بە داعشییەت تومەتباری دەکات!

یانزەیەم : مونافیقی هاوچەرخ خۆی بە زانا و موصليح دەزانێت، پێت سەیر نەبێ کە باسی ئیصلاح دەکات، هانی کردنەوەی زیناخانە دەدات بە بیانوی ڕێکخستنی کومەڵایەتی!!

دوانزەیەم : مونافیقی هاوچەرخ لێی وایە پێشکەوتنی ماددی دەوڵەتە پێشکەوتووەکان، لە بەر لێکجیاکردنەوەی دین و دەوڵەتە! بۆیە دەڵێت: دین تاکە جێگای مزگەوتە، و تەمبەڵی و دواکەوتنی ئەمڕۆی موسڵمانان بۆ ئیسلام دەگەڕێنێتەوە!
چاوپۆشی دەکات لە هاندانی ئیسلام بۆ کارکردن و پڕۆژەی ئیسلام بۆ دادپەروەری!
 
سیانزەیەم : سەیر لەوەدایە مونافیقە هاوچەرخەکانمان؛ هەموو دیانەتێکیان خۆش دەوێ - بە تایبەتی جولەکایەتی و دەوڵەتەکەیان لە فلسطين!- ئیسلام نەبێ!!

چوار دەیەم : مونافیقە هاوچەرخەکانمان؛ ڕقیان لە سعودیایە بە ئیجماع! ئەمەش تەنها لە بەر ئەوەی کە سعودیا بانگەوازی (توحید) دەکات، لە دادگاکانیاندا شەرعی خودا بەجێدەگەێنن، ڕێز لە حاجیان دەگرن، و  قورئانی پیروزیان بۆ سەدان زمان وەرگێڕاوە...

پانزەیەم : مونافیقی هاوچەرخ، بە ناڕاستەو خۆ شوبوهات دەدرکێنێ لەسەر نا ڕاستی فەرموودە، و نا مومکینی قورئان بۆ ئەم سەردەمە، لێی وایە قورئانی پیرۆز وەکو هەر کتێبێکی بەهاداری ئەدەب و شیعرە، و محمد ﷺ وەکو هەر سەرکردەیەکی سەرکەوتووە، عەقڵى بچوکی مونافیقەکەمان ئیستیعابی ماناکانی قورئان و حیکمەتەکانی پێغەمبەرایەتی ناکات، چونکە نایەوێت فێربێ؛ دەیەوێ فری بێ؛ بۆیە فڕەی دە؛ کە بیستت ئەم جۆرە قسانە دەکات لێی دوور کەوە!

لە کۆتاییدا :
بە برای موسڵمان دەڵێن:
١-- زیاتر لە خودای پەروەردگار بترسە، من و تۆ لەم سیفەتانە بێبەش نین، پێویستە خۆمان خاوێنکەینەوە.
٢-- زیاتر دڵنیابە، هەبوونی نیفاق، مانای هێزی ئیسلامە بۆیە مونافیقەکان خۆیان دەرناخەن.
٣-- زیاتر بیر بکەرەوە، مەوزوعەکە قابیلی زیادکردن و بە دواداچوون، وە بیرخستنەوەی موسڵمانانە، تا وەکو نەکەونە داو و پیلانی مونافیقەکان.

وە بە برادەری مونافیقیش دەڵێن:

١-- ڕزگاربوون لە دوعای هیدایەت دایە! بڕیاری دوعا کردنەکەش لە دەست خۆتە.
٢-- خۆشی دونیا و قیامەت تەنها لە ئیسلام و ئیماندایە. 
٣-- دەرگای تەوبەکردن و گەڕانەوە کراوەیە و قورئانی پیرۆزیش تاکە ڕێنیشاندەری ژیانە.

مامۆستا سامی مصطفی حسن

  سەرچاوەکان:
[وَلَوْ نَشَاءُ لَأَرَيْنَاكَهُمْ فَلَعَرَفْتَهُم بِسِيمَاهُمْ ۚ وَلَتَعْرِفَنَّهُمْ فِي لَحْنِ الْقَوْلِ ۚ وَاللَّهُ يَعْلَمُ أَعْمَالَكُمْ][سورة محمد 30].

°عَنْ عَبْدِ اللَّهِ بْنِ عَمْرٍو ، أَنَّ النَّبِيَّ صَلَّى اللَّهُ عَلَيْهِ وَسَلَّمَ قَالَ : «أَرْبَعٌ مَنْ كُنَّ فِيهِ كَانَ مُنَافِقًا خَالِصًا، وَمَنْ كَانَتْ فِيهِ خَصْلَةٌ مِنْهُنَّ كَانَتْ فِيهِ خَصْلَةٌ مِنَ النِّفَاقِ حَتَّى يَدَعَهَا : إِذَا اؤْتُمِنَ خَانَ، وَإِذَا حَدَّثَ كَذَبَ، وَإِذَا عَاهَدَ غَدَرَ، وَإِذَا خَاصَمَ فَجَرَ ».