بەناوى خواى بەخشەندەو میهرەبان
سەڵاوى خواى پەروەردگار لە تۆش:
بەڕێز: دەست خۆشیت لێ دەكەم كە مۆڵەتى ئەوەت بە خۆت نەداوە كە لە باسێكدا وەڵام بدەیتەوە كە ئاشنایى و زانینت لێ ى نەبێت، چونكە بەڕاستى لە بابەتە شەرعیەكاندا نابێت مرۆڤ لە خۆیەوە قسەیان تێدا بكات، وە دەستخۆشى ئەوەشت لێ دەكەم كە پەرۆشى زانینى وەڵامى ئەو پرسیارانەى بۆ خاوەنەكانیان، خواى پەروەردگار پاداشتى هەوڵ و كۆششەكانت بە خێر بداتەوە، ئەوەشت پێ ڕادەگەیەنم كە نابێت شەرمكردن ڕێگر بێت لە ڕێی فیر بوونى ئایین و بیروباوەڕدا.
ئەو شڵەیە لە شەرعدا پێ ى دەووترێت (المذي)، كە ئاوێكى سپى لینجى ڕوونە، لە كاتى بیركردنەوە، یان بینینى شتە هەست بزوێنەكان دەردەچێت، لە ئافرەت و پیاوانیشدا وەكو یەكە، حوكمەكەشى ئەوەیە كە لەش گران ناكات و پێویستى بە غوسل نابێت، تەنها ئەگەر موسڵمان دەستنوێژى هەبوو دەستنوێژەكەى بەتاڵ دەكاتەوە، و پێویستى بە تاراتگرتنێك دەبێت، و ئەگەر بەر جلەكەشى كەوتبوو ئەوا ئاو پرژێنێكى شوێنەكەى دەكات، و هیچى تر، خواش زانا ترە.
لە كۆتایدا تیبینى یەك دەخەمە ڕوو سەبارەت بە بەكارهێنانى ووشەى (لەش پیسى) كە لە پرسيارەكەدا هاتووە، و دەڵێم: بە كارهێنانى ئەم ووشەیە دروست نى یە، بەڵكو دەبێت بووترێت: غوسڵى لەش گرانى، یان غوسڵى جەنابە،... هتد.
چونكە پێغەمبەرى خوا ﷺ فەرموویەتى: سبحان الله... إن المسلم لا ينجس (البخاري: 1 / 333، ومسلم: 1 / 282).
واتە: موسڵمان پیس نابێت، و پاكە، والله أعلم.
لەلایەن مامۆستا (عدنان بارام) ەوە وەڵام دراوەتەوە