(13) خاڵی گرنگ سەبارەت بە زەکات: ماڵپەڕی وەڵامەکان
(13) خاڵی گرنگ سەبارەت بە زەکات
پرسیار:

ئەمەوێ بە کورتى باسی حوکم و ئادابەکانى زەکاتم بۆ بکەن 

بەناوى خواى بەخشندەى میهرەبان

ئەوەى گرنگ بێت تۆی موسڵمان بیزانیت سەبارەت بە زەکات بەکورتى بۆت باس دەکەین بە هیواى ئەوەى سودی لێ ببینی و شارەزا بیت لێی : 

۱.  زەكات فەرزە و یەكێكە لە پێنج پایەكەی ئیسلام و هەرکەس باوەڕی پێی نەبێت بێباوەڕ دەبێت .
۲. ئەو کەسەى زەکات نەدات ماڵ و سامانەکەى لە دۆزەخدا دەکرێتە پلێت و سور دەکرێت و لاشەی پێ داخ دەکرێت .
۳.  زەکات دان ناخ و دەرونت پاک دەکاتەوە ، فێری بەخشندەییت دەکات ، بەرەكەتیش دەخاتە ماڵ و سامانتەوە .
٤. زەکات واجب دەبێت لە دانەوێڵە و بەروبووم ،  وشتر و مانگاو مەڕ و بزن ، زێـڕ و زیـو یان ئەوەی شوێنیان دەگرێتەوە لە پارەی وشك ،  و ئەو شتەش بارزگانی پێوە دەكرێ و ئامادەیە بۆ فرۆشتن.
٥. زەکات بەچەند کۆمەڵێک دەدرێ لەوانە فەقیر و نەدارەکان وە باشتر وایە بدرێت بەو فەقیرو نەدارانەی کە خزمن.
٦. دروست نییە زەكات بدرێت بەو كەسانەی كە نەفەقەیان لەسەر ئەمە بەڵكو لەماڵی خۆی بەشیان دەدات.
٧.  دروست نیە زەكات بدرێت بە دایک و باوک ، هەروەها نابێت دایک و باوک زەکات بدات بە منداڵی خۆی .
٨.  هەر كەسێك قەرزی لای كەسێكی هەژار بوو ، و خستیە بەر زەكات ئەوا دروست نیە ، وە یان بڵێ زەكاتت دەدەمێ بەو مەرجەی تۆش قەرزەكەم بدەیتەوە ئەمە بە زەكات حساب نی یە و دروست نیە .
٩. زەکاتی کرێی خانو و دوکان و زەوی و سەیارە .... گەر کرێکەى کۆکرایەوە و گەشتە حەدی زەکات و ساڵی بەسەردا ڕۆشت ئەوا زەکاتى دەدەی ، بەڵام گەر مانگانە کرێکەت سەرف کرد ئەوا هیچ زەکاتی تێدا نیە .
١٠. گەر کەسێک پارەى دانابێ ژن بێنێ یان خانوو بکڕێ یان سەیارە یان هەر کارێکی تر ئەوا دەبێت زەکاتەکەی بدات مادام گەشتبێتە حەدی زەکات و ساڵی بەسەردا ڕۆشتبێ .
١١. هەر کەس پارەى لەماڵدا هەبێت و لەو لاشەوە قەرزار بێ ئەوا دەبێ زەکاتى پارەکەى بدات مادام گەشتبێتە حەدی زەکات و ساڵی بەسەردا ڕۆشتبێ و بەنیاز نەبێ جارێ قەرزەکە بداتەوە ، واتە : کە ئامادە نیە قەرزەکە بداتەوە دەبێ زەکاتەکەى بدات .
١٢. بۆ ئەمساڵ (٢٠٢٣) گەر پارەکەت لە (٧) ملیۆن و (٢٠٠) هەزار زیاترە ئەوا هەمووی دابەشی (٤٠) ی بکە بڕی زەکاتەکەت بۆ دەردەچێت . بۆ نمونە لە (١٠) ملیۆن (٢٥٠) هەزار زەکاتی تێدایە واتە بۆ یەک ملیۆن تەنها (٢٥) هەزار زەکاتی تێدایە ، وە لە یەك دەفتەر دۆلار دوو وەرەقە و نیو زەكاتی تێدایە  .
١٣. خشڵ و ئاڵتونی ئافرەتیش مادام گەشتبێتە حەدی زەکات و ساڵی بەسەردا ڕۆشتبێ زەکاتی دەدرێ بەتایبەت کە بەکاری نەهێنێت .

سەردان: ٢,٥٨٣ بەش: زەکات و سەرفیترە