دانانى دەستى ڕاست لەسەر دەستى چەپ لە نوێژدا سوننەتە لەبەر فەرموودەى سەهلى كوڕى سەعد رضي الله عنه  كە دەڵێت: ((كان الناس يؤمرون أن يضع الرجل يده اليمنى على ذراعه اليسرى في الصلاة)). أخرجه البخاري^(١)

واتە: خەڵكى فەرمانیان پێكرا بەوەى كە كەسێك دەستى ڕاستى لەسەر باڵى چەپی دابنێت لە نوێژدا.

بەڵام لە كوێ دایبنیت؟

وەڵام: نزیكترین ڕاو بۆچون یان وتە لەم بوارەدا ئەوەیە كە دانانى دەست لەسەر سنگە لەبەر فەرموودەكەى وائیلى كوڕى حجر رضي الله عنه  كە دەلێت: ((كان يضع يده اليمنى على اليسرى على صدره ))^(٢)

واتە: پێغەمبەرى خوا ﷺ دەستى ڕاستى لەسەر دەستى چەپی دادەنا لەسەر سنگى. جا فەرموودەكە هەرچەندە هەندێك لاوازى تێدایە، بەڵام نزیكترینیانە لە صحەتەوە.

بەڵام دانانى لەسەر دڵ و لاى چەپ ئەوا بیدعەیە و هیچ بنچینەیەكى نییە.

هەروەها دانانى لەژێـر ناوك ئەوا ئەسەرێك ریوایەت كراوە لە عەلیەوە رضي الله عنه ^(٣) بەڵام لاوازە، وە فەرموودەكەى وائیلى كوڕى حجر لەوە بەهێزترە.

وە ئەم حوكمە هیچ جیاوازیەكى نییە بۆ پیاو و ئافرەت، چونكە لە بنچینەدا پیاوان و ئافرەتان هاوتان لە حوكمە شەرعیەكاندا، مەگەر بەڵگەیەك هەبێت لەسەر جیاوازیەكە وبەوەى لەنێوانیاندا جیاكارى كردبێت، وە من هیچ بەڵگەیەكى صەحیح نازانم كە جیاوازى بكات لەنێوان پیاو وئافرەتدا لەم سوننەتەدا. 

سەرچاوە : کتێبی فتاوى أرکان الإسلام: زاناى پایەبەرز : محمد بن صالح العثیمین - رحمه الله –