بسم الله الرحمن الرحیم
سوپاس و ستایش بۆ خواى گەورە وە درودو سڵاو لە سەر گیانى پێغەمبەرى خوا وە لەسەر خێزان و كەس وكارى ئیماندارو هاوەڵان و شوێن كەوتوانى تا رۆژى دوایى.

ئەمەى خوارەوە بریتی یە لە (20) جۆر لەو شیرکانەى کە لەنێو خەڵکی و کۆمەڵگادا بەربڵاوە : 
1.    داواكردن و هانا بردن و پەنا گرتن لە غەیری خودای پەروەردگار ، وەكو: بڵێت ، یا رسول الله شیفام بۆ بنێرە ، یا شیخ عبدالقادر گەیلانی بمپارێزە ، بەهانامەوە وەرە ، ڕزقم زیاد بكە .
2.    ترسان لە غەیری خودای پەروەردگار ، وەكو ترسان لە گۆڕی پیاوچاكان.
3.    حەیوان سەربڕین بۆ غەیری خودای پەروەردگار ، وەكو حەیوان سەربڕین لەسەر گۆڕی پیاوچاكان یان بۆ جنۆكەكان .
4.    نەزركردن بۆ غەیری خودای پەروەردگار ، وەكو حەیوانێك لەسەر خۆی نەزر بكات بۆ گۆڕی پیاوچاكێك هەر كاتێك كارەكەی بۆ جێ‌ بەجێ‌ بوو .
5.    خۆش ویستنی كەسێك بە ئەندازەی خۆشویستنی خودای پەروەردگار ، یان زیاتر لە ئەندازەی خۆش ویستنی لەخودا
6.    ووتنی : ئەگەر ویستی خودا و ویستی تۆی لەسەر بێت .  ووتنی : لە سایەی تۆ و لە سایەی خودای پەروەردگار .
7.    هەڵواسینی نوشتە و پەڕۆی سەوز و دار تاوك بە خۆتەوە یان مناڵەكانتەوە یان سەیارەكەتەوە ، بە مەبەستی پاراستن لە چاو و زار .
8.    هەڵواسینی ناڵی گوێدرێژ و ئێسك و قۆچی حەیوان بە خانوەكەتەوە یان سەیارەكەتەوە یان باخچەكەتەوە بە مەبەستی پاراستن لە چاوەزار .
9.    چونە سەر گۆڕی پێغەمبەران و پیاوچاكان بۆ داواكردن لێیان بە مەبەستی چارەسەری نەخۆشی یان منداڵ بوون یان هەر شتێكی تر كە لە توانای غەیری خودای پەروەردگار دا نیە .
10.    دەست هێنان بە كێل و قەفەزی گۆڕی پێغەمبەران و پیاوچاكان بۆ تەبەڕوك.
11.    سوجدە بردن بۆ گۆڕی پیاوچاكان یان بۆ ئەو كەسەی كە زیندووە و بە شێخ مەشهوورە .
12.    تەواف كردن بە دەوری غەیری كەعبەی ماڵی خودای پەروەردگار ، وەكو تەواف كردن بە دەوری گۆڕی پێغەمبەرێك یان پیاوچاكێك یان هەر كەسێك و هەر شتێك.
13.    كڕنوش بردن و خۆدانەواندن بۆ غەیری خودای پەروەردگار .
14.    باوەڕ بوون بە سحرباز و جادووگەرو شوین هەڵگر .
15.    دانە پاڵی باران بارین بۆ لای غەیری خودای پەروەردگار وەكو ئەستێرەكان یان پیاوچاكان .
16.    كردنی عیبادەتێك بۆ بینینی خەڵك كە پێی دەڵێن (الریا) واتە ڕووبینی.
17.    كردنی عیبادەتێك بۆ بیستنی خەڵك كە بە عەرەبی پێی دەڵێن (السمعە) واتە: ووتنی قسەیەكی باش یان زیكرێك بۆ ئەوەی خەڵك لێی ببیستێت تاوەكو پێی بڵێن بەڕاستی پیاوێكی بە تەقوایە .
18.    كردنی عیبادەتێك بۆ بە دەستهێنانی شتێك لە دونیادا. 
19.    سوێند خواردن بە غەیری خودای پەروەردگار ، وەكو بڵێت بە پێغەمبەر ، یان بە گۆڕی شێخی ، یان بە سەری تۆ ، یان بە سەری من ، یان بەسەری كوڕم ، یان بەگۆڕی باوكم ، یان بە هەردروستكراوێك لە دروستكراوەكانی خودای پەروەردگار .
20.    گوێڕایەڵی كردنی كەسێك لە حەڵاڵ كردنی شتێكی حەرام ، یان لە حەڕام كردنی شتێكی حەڵاڵ .

مامۆستا هەڵگورد گەڵاڵەیی