زەكات دروست نییە تەنها بۆ ئەو هەشت جۆرە نەبێت كە خواى گەورە باسیانى كردووە، وەكو دەفەرموێت: (إِنَّمَا الصَّدَقَاتُ لِلْفُقَرَاءِ وَالْمَسَاكِينِ وَالْعَامِلِينَ عَلَيْهَا وَالْمُؤَلَّفَةِ قُلُوبُهُمْ وَفِي الرِّقَابِ وَالْغَارِمِينَ وَفِي سَبِيلِ اللَّهِ وَابْنِ السَّبِيلِ فَرِيضَةً مِنَ اللَّهِ وَاللَّهُ عَلِيمٌ حَكِيمٌ) (التوبة:60) ، واتە: زەكاتە فەرزەكان تەنها دەدرێت بەم كۆمەڵە خەڵكانە : ئەو نەدارانەى كە هیچیان نیە ، و ئەو كەمدەستانەى كە بەپێى پێویست بژێویان نیە ، و ئەو كرێكارانەى كە زەكات و سەدەقەكە كۆدەكەنەوە ، و ئەوانەى كە بەزەكاتەكە دڵنەواییان دەكەنەوە ، لەوانەى كە ڕجاى ئیسڵام بوونیان دەكرى یان ئومێدى پتەوبوونى باوەڕیان دەكرێت ، یان سوودى بۆ موسڵمانان هەبێت ، یان بەهۆیانەوە شەڕ و خراپەیەك لە موسڵمانان دوور دەخەنەوە ، وە دەدرێت بۆ ئازادكردنى ئەو كۆیلە و بەندانەى كە گرێبەندیان لەگەڵ گەوەرە و خاوەنەكانیان نوسیوە بۆ ئازادبوونیان ، وە بە قەرزارانیش ( ئەوانەى كە قەرزاربوون لە ئاشتەوایى نێوان دوو كەسدا ، و ئەوانەش كە قەرزارى بارى سەرشانى قورس كردوون لەشتێك كە خراپە و ئیسراف و زیادڕەوى نەبووبێت ، ئێستا تواناى دانەوەیان نیە ) ، وە بۆ تێكۆشەرانى ڕێگاى خواى پەروەردگار ، و بەو ڕێبوارانەى كە بژێویان لێبڕاوە و ناگەنە جێگاى خۆیان ، ئەم دابەشكردنە خواى پەروەردگار دیارى كردوون وبڕیارى لەسەر داوە . و خواى پەروەردگاریش زانایە بەبەرژەوەندى بەندەكانى و كارزان وكاربەجێیە لە بەڕێوەبردن و شەرعەكەیدا .
جا بۆیە دروست نییە بۆ دروست كردنى مزگەوت و فێركردنى عیلم و شتى لەو شێوەیە، بەڵام صەدەقەى سوننەت باشتر وایە لە شتى بەسوددا سەرف بكرێت.
ئەو هەژارەى كە شایستەى زەكاتە ئەوەیە كە ئەوەندە بژێـوى خۆى و خێزانى نییە كە پێویست بێت بۆ ماوەى ساڵێك ئەوەش بەپێى شوێن و كات، بۆ نمونە لەوانەیە هەزار ریال لە شوێن و كاتێكدا بە دەوڵەمەند لەقەڵەم بدرێت و لەشوێن وكاتێكى تردا بە دەوڵەمەند هەژمار نەكرێت، وە لە كات و شوێنێكى تریشدا بە دەوڵەمەند دانەنرێت لەبەر گرانى گوزەران و شتى لەو بابەتە.

سەرچاوە : کتێبی فتاوى أرکان الإسلام: زاناى پایەبەرز : محمد بن صالح العثیمین - رحمه الله -