بسم الله الرحمن الرحیم
سوپاس و ستایش بۆ خواى گەورە وە درودو سڵاو لە سەر گیانى پێغەمبەرى خوا وە لەسەر خێزان و كەس وكارى ئیماندارو هاوەڵان و شوێن كەوتوانى تا رۆژى دوایى.
گومانی تێدا نیە كە بەردەوامی و دامەزراوی لە سەر دینی خوا تاكو دوا هەناسەی ژیان پێویستیەكی داواكراوو جوانترین دیاری خوایە بۆبەندەكانی
مانگی ڕەمەزانیش وێستگەیەکی گەورەی ڕۆحانییە کە تێیدا ئیمان و عیبادەت دەگاتە لوتکە. 
زۆر ئاساییە دوای تەواوبوونی ئەم مانگە مرۆڤ هەست بە کەمێک دابەزینی ئیمانی بکات، بەڵام گرنگ ئەوەیە ئەم ساردبوونەوەیە نەبێتە هۆی پچڕان و دوورکەوتنەوە لە خواپەرستی. با هەمیشە ئەو ڕاستییەمان لەبیر بێت کە: "پەروەردگاری ڕەمەزان، پەروەردگاری هەموو مانگەکانی تریشە."

بۆ ئەوەی پارێزگاری لەو گڕوتینە ڕۆحانییە بکەیت و لەسەر خەت بمێنیتەوە، ئەم هەنگاوانەی خوارەوە زۆر گرنگن:

١. کەم و بەردەوام باشترە لە زۆر و پچڕاو
یەکێک لە گەورەترین هەڵەکان ئەوەیە کە بمانەوێت بە هەمان ڕیتم و هێزی ڕەمەزانەوە بەردەوام بین. ئەمە زۆرجار مەحاڵە و دەبێتە هۆی بێهیوایی و زۆر ناخایەنێت. 
پێغەمبەری خوا (ﷺ) دەفەرموێت: "خۆشەویستترین کردەوە لای خوا ئەوەیە کە بەردەوام بێت هەرچەندە کەمیش بێت".

٢. پەیوەندیت لەگەڵ قورئان مەپچڕێنە
لە ڕەمەزاندا هەموومان قورئان زۆر دەخوێنین و خەتمی دەكەین، با دوای ڕەمەزان ئەو پەیوەندییە نەپچڕێنین و بەردەوام بین . گەر ڕۆژانە تەنها نیو كاتژمێر تەرخان بكەی بۆ قورئان خوێندن ئەوا زۆر بەئاسانی هەموو مانگێك خەتمی قورئان دەكەی. بۆیە با لەو كەسانە نەبیت تەنها ڕەمەزان بۆ ڕەمەزان قورئان خەتم دەكەن .

٣. پارێزگاری لە نوێژەکان و شەونوێژ
نوێژە فەرزەکان هێڵی سوورن و دەبێت لە کاتی خۆیاندا بکرێن. لەگەڵ ئەوەشدا، هەوڵ بدە شەونوێژ و ویتر بەر لە خەوتن ئەنجام بدەیت، بۆ ئەوەی ئەو تامە شیرینەی شەونوێژەکانی ڕەمەزانت لەبیر نەچێتەوە.

٣. ڕۆژووە سوننەتەکان مەفەوتێنە
بۆ ئەوەی جەستە و ڕۆحت بەتەواوی لە ڕۆژوو دانەبڕێت، هەوڵ بدە زوو زوو ڕۆژووی سوننەت بگریت. وەک:
گرتنی ٦ ڕۆژ لە مانگی شەوال.
ڕۆژووی دووشەممە و پێنجشەممەی هەموو هەفتەیەک.
ڕۆژووی سێ ڕۆژە سپییەکەی هەموو مانگێکی کۆچی (١٣، ١٤، ١٥).

٥. هاوڕێیەتی کەسانی ساڵح و باش
ئەو ژینگەیەی تێیدا دەژیت کاریگەری زۆری لەسەرت هەیە. کاتەکانت لەگەڵ کەسانێک بەسەر بەرە کە یادخەرەوەی خێر و چاکەن بۆت. دوورکەوە لەو دانیشتن و شوێنانەی کە دەبنە هۆی ساردبوونەوەی دڵ و بیرچوونەوەی یادی خوا.

٦. زۆر دوعاکردن بۆ "جێگیربوون" (الإستقامة)
بەردەوامبوون لەسەر چاکە نیعمەتێکە لەلایەن خوای گەورەوە، بۆیە دەبێت لێی بپاڕێینەوە کە پێمان ببەخشێت. یەکێک لە دوعا زۆرەکانی پێغەمبەر ﷺ ئەوە بوو: "يا مقلب القلوب ثبت قلبي على دينك" (ئەی ئەو زاتەی دڵەکان هەڵدەگێڕیتەوە، دڵم جێگیر و چەسپاو بکە لەسەر دینەکەت).

ڕەمەزان کۆتایی دێت، بەڵام عیبادەت تا کۆتایی تەمەن بەردەوامە وەک خوای گەورە دەفەرموێت: {وَاعْبُدْ رَبَّكَ حَتَّى يَأْتِيَكَ الْيَقِينُ}